Azərbaycan idman ictimaiyyətində nostalji ab-hava yaradacaq bir paylaşım sosial şəbəkələrdə böyük marağa səbəb olub.
32gun.az xəbər verir ki, Əməkdar bədən tərbiyəsi və idman xadimi, Əməkdar məşqçi, beynəlxalq dərəcəli hakim Vahid Nəzərov tərəfindən yayımlanan nadir qara-ağ foto, 1975–1982-ci illərdə fəaliyyət göstərmiş Azərbaycan Ağır Atletika yığma komandasının üzvlərini əks etdirir.
Tarixi fotoda ölkə idman tarixinin əfsanə adları — Akif Alıyev, Cəbrayıl Cəbrayılov və Nazim Mahmudov yer alıb. Dəniz kənarında çəkilmiş bu şəkil o dövrün gənc, əzmkar və güclü atletlərinin ruhunu nümayiş etdirir.
Həmin illərdə SSRİ miqyasında mühüm uğurlar qazanan bu idmançılar Azərbaycan ağır atletikasının qızıl fonduna daxil edilirlər. Xüsusilə, Akif Alıyev sonrakı illərdə də idmandan ayrılmayaraq veteranlar arasında dəfələrlə dünya və Avropa çempionu titulunu qazanıb. O, 1979-cu ildə SSRİ idman ustası adına layiq görülüb.
Bu kimi unikal fotoların üzə çıxarılması və ictimaiyyətlə paylaşılması, Azərbaycan idman tarixinin qorunması və gənc nəslin bu əfsanəvi idmançılarla tanış olması baxımından böyük əhəmiyyət daşıyır.
Vahid Nəzərovun paylaşımı həm keçmişin dəyərli səhifələrini yada salır, həm də ağır atletika ənənələrinin nə qədər güclü təməllər üzərində qurulduğunu bir daha göstərir.
Ayaz
.jpg)
.jpg)
