Şəhərdə velosiped sürmək: faydaları və təhlükəsizlik tövsiyələri

Müasir şəhər həyatının sürəti, tıxaclar və artan stress insanların fiziki fəaliyyətə olan ehtiyacını gündəmə gətirir. Bu şəraitdə velosiped sürmək həm effektiv nəqliyyat vasitəsi, həm də sağlam həyat tərzini qorumağın sadə, əlçatan yolu kimi ön plana çıxır. Velosiped yalnız ətraf mühit üçün faydalı deyil, eyni zamanda istifadəçisinin fiziki və psixoloji sağlamlığına da ciddi müsbət təsir göstərir. Araşdırmalar göstərir ki, şəhər mühitində velosiped sürmək ürək-damar sistemini gücləndirir, əzələ kütləsini inkişaf etdirir, enerjini artırır və stressi azaldır.

32gun.az bu barədə araşdırma aparıb:

İdman mütəxəssisi Samir Məmmədəliyov  32gun.az-a  bildirir ki, velosiped sürmək təkcə fiziki sağlamlıq deyil, həm də həyat keyfiyyətini yüksəldən bir vərdişdir. “Hər gün 20-30 dəqiqə velosiped sürmək metabolizmi sürətləndirir, kalori sərfini artırır və əzələlərin tonusunu qoruyur. Bundan əlavə, velosiped psixoloji gərginliyi azaldır, stress və depressiya riskini minimuma endirir. Xüsusilə şəhər mühitində, avtomobil hərəkətinin çox olduğu ərazilərdə velosiped sürmək həm sürücülər, həm də piyada üçün havanı təmiz saxlayır, səs-küyü azaldır və urban həyatın mənfi təsirlərini yüngülləşdirir,” – deyə S.Məmmədov vurğulayır.

Ekspert təhlükəsizlik mövzusuna da xüsusi diqqət yetirir. “Velosiped sürərkən kaska taxmaq, görünən və işıqlı geyimlərdən istifadə etmək, əl siqnalları ilə istiqamət dəyişikliklərini xəbər vermək vacibdir. Yol hərəkəti qaydalarına ciddi riayət etmək, həm özünüzün, həm də ətrafdakıların təhlükəsizliyini təmin edir. Şəhər yollarında avtomobillərlə və digər nəqliyyat vasitələri ilə qarşılıqlı hərəkət zamanı diqqət və planlaşdırılmış sürüş həyati önəm daşıyır. Həmçinin velosiped yolları və ya ayrılmış xəttlərdən istifadə etmək qəza riskini əhəmiyyətli dərəcədə azaldır,” – deyə S.Məmmədov əlavə edir.

O, həmçinin qeyd edir ki, velosiped sürmək yalnız fiziki məşq deyil, eyni zamanda həyat tərzini dəyişdirən bir vərdişdir. “Şəhərdə velosiped sürən insanlar daha aktiv, enerjili və sağlam həyat sürürlər. Bu həm gündəlik stressdən uzaqlaşmağa, həm də ətraf mühitə fayda verməyə imkan yaradır. Kiçik addımlarla başlasaq da, nəticədə sağlam və davamlı vərdişlər formalaşır,” – deyə ekspert əlavə edir.

Nilay ÖzSöz